Pas disa muajsh kërkime, kombëtarja braziliane më në fund e gjeti trajnerin e ri. Konfederata Braziliane e Futbollit, vendosi t’ia besojë stolin ekspertit italian, Carlo Ancelotti.
Tekniku 64-vjeçar u bind nga projekti dhe do të marrë drejtimin e Selecaos në fund të kontratës së tij me Real Madridin, pra në vitin 2024. Një zgjedhje e goditur sipas Konfederatës Braziliane të Futbollit.
Por, ka edhe nga ata që janë kundër Ancelottit dhe së fundmi presidenti i Brazilit, Luiz Inacio Lula da Silva, ose thjesht Lula, thekson se do të ishte më mirë që italiani të merrej me problemet e kombëtares së tij, Italisë.
“Ancelotti më pëlqen, nuk është se kam diçka kundër tij, por di që nuk ka qenë kurrë trajner i kombëtares së Italisë. Pse të mos zgjidhë fillimisht problemet e vendit të tij pasi Italia nuk ka marrë pjesë në dy Botërorët e fundit.
Mua më duket shumë e thjesht të trajnosh në Europë me 11 futbollistë që i përzgjedh vetë, vështirësia është të vish në Brazil dhe të marrësh përsipër Corinthians. Jam kurioz të shoh se çfarë do të bënte Ancelotti me Corinthians”, u shpreh Lula.
Discussion about this post