Dhuna e fisit Rraja, shpallet në kërkim Rexhep Rraja

Policia njofton se për dhunën shtazarake ndaj dy anëtarëve të fisit Maja në Krujë është shpallur në kërkim Rexhep Rraja.

Rexhep Rraja është djali i deputetit të Partisë Socialiste, Rrahman Rraja. Ai shfaqet në video duke dhunuar Bilbil dhe Jashar Majën. Shpallja në kërkim u bë pas presioneve nga opozita dhe mediat.

Rraja dhe më herët ka qenë emër tepër i lakuar në media, teksa u bë i njohur për faktin se u akuzua se kishte dhunuar ish-të dashurën e tij.

Mediat raportuan më herët se Rexhep Rraja dhe në rrjetet sociale tregonte jetën e luksit që bënte me makina të shtrenjta. Pasioni i tij kishte lidhje edhe plumbat, teksa shfaqte në rrjetet sociale edhe foto me kallashnikovë. Përveç armëve, tufave me euro e makinave, Rexhepi kishte edhe foto të disa rrënjëve me kanabis.

“DVP Tiranë

Në vazhdim të veprimeve hetimore në lidhje me ngjarjen e ndodhur me datë 06.07.2023, ku në një lokal në aksin rrugor Fushë Krujë-Thumanë, një grup personash kanë goditur me sende të forta shtetasit B. M., dhe J. M., Policia e Shtetit ka ndaluar 4 persona dhe ka shpallur në kërkim 3 të tjerë.

Në vijim të veprimeve hetimore është identifikuar dhe shtetasi R. Rr., për të cilin janë dërguar materialet pranë Prokurorisë së Gjykatës së Shkallës së Parë të Juridiksionit të Përgjithshëm Tiranë.

Shtetasi R. Rr., është shpallur në kërkim policor dhe vijon puna nga shërbimet e Policisë, për lokalizimin dhe kapjen e tij.

Vazhdon puna për identifikimin e personave të tjerë të përfshirë në këtë ngjarje”, njofton policia.