Belinda Balluku, zv.Kryeministre, në një intervistë për Zërin e Amerikës, tha se Partia Socialiste nuk do të bëhet mburojë për askënd që ka problem me drejtësinë.
Balluku tha se ashtu si edhe në rastet e mëparshme, edhe në atë të Arben Ahmetajt, Qeveria as ka ndërhyrë dhe as ka ndërmend të ndërhyjë në punët e drejtësisë.
“Nuk kemi asnjë plan për të mbrojtur askënd. Por i njëjti intensitet që ndiqet nga SPAK për anëtarë të Qeverisë aktuale apo kryebashkiakë të PS, duhet të ndiqet edhe me ish-qeverinë e mëparshme. SPAK duhet të ndjekë të njëjtën strategji edhe me ish-ministrat apo familjarët e ish-drejtuesve të PD-së, pasi dosjet janë në SPAK”, tha Balluku.
Lidhur me inceneratorët, Balluku tha se nuk ka pasur asnjë lidhje me procesin pasi ajo u emërua ministre kohë më pas.
“Inceneratorët ishin një vision i Edi Ramës për ti dhënë zgjidhje plehrave, mallet me plehra që digjeshin. Rama kishte një vision për ti dhënë një zgjidhje përfundimtare mbetjeve urbane. Nëse disa ministra nuk e kanë kryer ashtu siç duhet detyrën, megjithëse duhet pritur vendimi nga Gjykata, deri më sot nga dokumentet shihet se kemi veprime individuale dhe jo një politikë të Qeverisë”, tha Balluku.
Sipas saj, kjo nuk e bën me faj Kryeministrin dhe askënd tjetër që nuk është i përfshirë në këtë situatë.
Lidhur me aktet e dhunës së fisit Rraja ndaj dy pjesëtarëve të fisit Maja, Balluku tha se është një fatkeqësi për ish-deputetin Rrahman Rraja që të jetë i përfshirë në këtë situatë.
“Më vjen keq që ai pati problem të tilla, edhe pse vetë nuk ishte i përfshirë, por duke qenë figurë publike i duhet të mbajë përgjegjësi për atë që bën familjarë të tij”, tha Balluku.
Discussion about this post