Ministrja e Arsimit, ashtu si gjithmonë është kujtuar se një pedofil është emëruar si mësues mes nxënësve vetëm pasi lajmi ka marrë dhenë. Ajo, duke bërë si e indinjuar, është mjaftuar me një reagim në Facebook, duke deklaruar se e ka shkarkuar mësuesin e dënuar për pedofili, të cilin e kishin futur në radhët e nxënësve në Berat.
“Dënoj fort rastin e punësimit me kontratë të një mësuesi në Berat, që në vitin 2003 është dënuar nga gjykata për pedofili. Pavarësisht se gjykata nuk ia hoqi të drejtën e rikthimit në detyrë dhe të ushtrimit të profesionit, edhe pse prokuroria e kërkoi një gjë tillë, është e pafalshme që persona të tillë të hyjnë qoftë edhe për një orë të vetme në mjediset e shkollave tona. Ky person është larguar menjëherë nga detyra dhe ndërkohë kemi nisur një hetim administrativ për të gjetur personin apo personat përgjegjës, që me neglizhencë apo paaftësi, nuk kanë marrë informacionin e duhur dhe kanë lejuar punësimin e tij. Për ta do të merret menjëherë masë ndëshkuese”, deklaroi Kushi, duke “shitur” vartësit e saj, që në fakt dihet mjaft mirë sesi bëhet emërimi i tyre, ku asnjë emër nuk kalon pa pëlqimin e ministres përkatëse. Më tej, Kushi vë në dukje se për të është e shenjtë mbrojtja e nxënësve, por nuk shpjegon nëse këta ua kishte thënë më herët vartësve të saj, të cilët e kishin lënë ujkun të lirë në mes të kopesë. Megjithatë, ministrja, ashtu si në raste kur e ka litarin te fyti, vepron edhe kryeministri, fajin ia ka hedhur sistemit. “Ne në MAS do të rishikojmë menjëherë bazën ligjore dhe nënligjore, për të forcuar rregullat dhe procedurat e punësimit apo shkarkimit të mësuesve, për të mos lejuar që të ndodhin më raste që mund të përbëjnë rrezik për fëmijët tanë”, ka deklaruar ministrja për të na qetësuar, duke bërë thirrje që të denoncojmë çdo rast, ndërkohë që kjo detyrë sidomos për personat e skeduar për pedofili nuk është e prindërve, por e sistemit arsimor, të cilit prindërit i besojnë më të shtrenjtit e tyre.
Discussion about this post