Kryeministri Edi Rama do të mbledhë kabinetin qeveritar në një takim informal, që do të zgjasë dy ditë, ndërsa analistë të ndryshëm parashikojnë ndryshime në Qeveri.
Rama ka vendosur që mbledhjen ta zhvillojë në Tepelenë në datat 28-29 korrik, në një format të ngjashëm me mbledhjet e zhvilluara vitet e fundit në qytete të ndryshme të vendit.
Përgjithësisht Kryeministri i ka konsideruar takimet informale si analiza për punën e secilit ministër dhe institucioneve në varësi, përcaktimin e objektivave si dhe afateve. Por në përfundim të tyre janë njoftuar edhe ndryshimet në Qeveri.
Dhe ndoshta pikërisht nga kjo praktikë, analistë të ndryshëm kanë paralajmëruar ndryshime në kabinetin qeveritar.
Gazetari Aleksandër Çipa nga studio e Euroneës tha se pas ndryshimeve në Sekretariatin e PS-së, natyrisht që priten edhe ndryshime në Qeveri.
“Janë ndryshime që lidhen me dy pritshmëri. Pritshmëria e parë e arritjes në mandatin e tretë të Partisë Socialiste të ketë një strukturë si kabineti qeverisës që ka më shumë peshë specifike politike dhe më shumë nivel të përfaqësimit politik partiak, apo edhe politik në përgjithësi.
Në dy kabinetet e mëhershme nuk ka qenë kjo preferenca, por ka qenë një tendencë e kryeministrit për të gjeneruar dhe promovuar emra të rinj, për të ndryshuar elitën politike, qoftë të nivelit ekzekutiv, qoftë dhe nivelit partiak të drejtimit në Partinë Socialiste dhe për të krijuar një perceptim të gjerë publik se Partia Socialiste tashmë është një parti që përfaqësohet nga gjeneratat e reja të politikbërësve të përfaqësimeve, ndonëse se në gjithë tendencën apo në gjithë kriteret e ndryshimeve të kabineteve qeverisëse, sidomos në mandatin e dytë dhe të tretë vihet re shpërfillje e meritokracisë dhe investimit apo karrierës politike”, u shpreh Çipa.
Discussion about this post