Presidenti i Sllovenisë, Borut Pahor do të vizitojë sot Kosovën, ku do të takohet me presidenten Vjosa Osmanin, kryeministrin Albin Kurti dhe komandantin e KFOR-it, Ferenc Kajari.
Sipas njoftimit të Presidencës, në orën 10:00, Osmani do të presë në kabinetin e saj presidentin Pahor, ndërsa në orën 11: 300 Pahor do të takohet me Kurtin.
Ditën e dielë, Pahor qëndroi në Beograd, nga ku deklaroi se është i shqetësuar për dialogun Kosovë-Serbi. Këtë deklaratë, ai e bëri pas takimit me presidentin e Serbisë, Aleksandar Vuçiç.
Presidenti slloven theksoi se zgjerimi i Bashkimit Evropian do të ishte vendimtar për paqen dhe sigurinë, si dhe për mirëqenien e njerëzve në këtë rajon.
“Faleminderit presidentit Vuçiç për këtë bisedë dhe për përmendjen e ushtarëve sllovenë në Kosovë, dhe që unë do t’i vizitoj nesër”, tha Pahor.
Ai shtoi se gjatë vizitës së tij në Kosovë do të kërkojë të zbatohet gjithçka që është rënë dakord në marrëveshjen e Brukselit. Pahor tha se është i shqetësuar edhe sepse dialogu ndërmjet Kosovës dhe Serbisë është ndërprerë dhe shtoi se ai duhet të vazhdojë.
“Sllovenia është një përkrahëse e madhe e atij dialogu dhe ende e mbështet atë”, tha ai, duke theksuar se zvarritja e këtij procesi nuk i kontribuon askujt.
Discussion about this post