Vrau italianin, kërcënohet në burg Klajdi Mjeshtri: Je një i vdekur..

Giuseppe Tucci, zjarrfikësi nga Foggia i cili u sulmua nga një shqiptar në një disko në Rimini, vdiq në spital nga plagët e marra disa kohë më parë.

Shqiptari Klajdi Mjeshtri u arrestua për vrasjen, dhe tani, më shumë se një muaj më vonë, historia tragjike rrezikon të përshkallëzohet sepse shqiptari është kërcënuar me vdekje, përmes një letre anonime.

“Do ta marri vesh se çfarë do të thotë të vrasësh një nga vëllezërit tanë nga Foggia. Jozefi do të hakmerret. Shqiptari është një i vdekur që ecën”, shkruhet në letrën dërguar redaksive të dy gazetave lokale.

Giuseppe Tucci u rrah natën mes 10 dhe 11 qershorit nga 28-vjeçari shqiptar Klajdi Mjeshtri. Dyshohet se Mjeshtri fillimisht e shoqëroi zjarrfikësin jashtë diskos dhe më pas e rrahu.

Tucci punonte në repartin e zjarrfikësve të aeroportit “Fellini” duke ndjekur hapat e babait të tij Klaudios, njëkohësisht drejtues ekipi i zjarrfikësve në Potenza.