Një ceremoni e pazakontë është zhvilluar në Çeki, lidhur me dekretimin e kryeministrit të ri Petr Fiala. Presidenti çek, Milos Zeman, ka dekretuar kryeministrin Fiala, ndërsa qëndronte brenda një kutie xhami pasi rezultoi pozitiv me Covid-19.
77-vjeçari ishte i ulur në një karrige me rrota dhe i shoqëruar nga një mjek i veshur tërësisht me pajisje mbrojtëse, pasi u sëmur me Covid gjatë një qëndrimi prej gjashtë javësh në reanimacion.
Fiala udhëheq një bllok të pesë partive opozitare të qendrës së djathtë. Ky bllok opozitar fitoi zgjedhjet e mbajtura në tetor, duke larguar nga pushteti kryeministrin çek, Adrej Babish dhe aleatët e tij.
Qeveria e re çeke do të duhet të përballet me valën e re të infektimeve me koronavirus, që po rrezikon të mbingarkojë spitalet. Po ashtu, sfidë për ekzekutivin e ri do të jetë kriza energjetike, pas kolapsimit të një ofruesi të madh të energjisë. Koalicioni ka thënë se planifikon të ripunojë buxhetin e shtetit për vitin 2022, me qëllim që të zvogëlojë deficitin e lartë.
Discussion about this post