Vrasja e Gentian Taljas në ish-Bllok, arrestohet në Rinas Henri Gjapi

Ngjarja ka ndodhur më 31 mars 2023 në rrugën “Vaso Pasha” në ish-Bllok.

Gentian Talja, 46-vjeç, dhe Henri Gjapi, 25 vjeç, u takuan rastësisht rreth orës 02:00 pas mesnate. Të dy, në gjendje shumë të dehur, nisën të grinden me njëri-tjetrin pa asnjë shkak, pa pasur asnjë njohje më herët. Dy burrat shihen përmes kamerave të sigurisë që konfliktohen më duar, ne momentin që Artur Gjolena, 41 vjeç, po ashtu i rastësishëm në vendin e ngjarjes, ndërhynë dhe mundohet t’i ndaj.

Pak çaste më vonë 46-vjeçari Talja humb ekuilibrin si në një gjendje të fikti dhe shembet në tokë. Në pamjet e kamerave që policia ka sekuestruar, shihet Talja teksa gjatë rënies godet me kokë bordurën e trotuarit.

Menjëherë u dërgua në spital për ndihmë mjekësore bashkë me Gjapin. Në orët në vijim 46-vjeçari Talja është përmendur, ka komunikuar dhe ka qenë jashtë rrezikut për jetën, teksa Henri Gjapi ka lënë spitalin pa probleme.

Në orët e pasdites gjendja e Gentianit është rënduar dhe rreth orës 19:00 ka rënë në gjendje kome. Ai nuk është përmendur më dhe ka humbur jetën katër ditë më vonë, mbrëmjen e së martës së 4 prillit.

Policia shpalli në kërkim Henri Gjapin, në la gjendje të lirë personin e tretë që ndërhyri për t’i ndarë, Artur Gjolena.

 

Njoftimi i Policisë;

Në vijim të punës për kapjen e shtetasve të shpallur në kërkim dhe për vënien e tyre përpara përgjegjësisë penale, shërbimet e Seksionit për Hetimin e Krimeve ndaj Personit, në bashkëpunim me Komisariatin e Policisë Rinas, në hyrje të Republikës së Shqipërisë, si rezultat i analizës së riskut dhe i veprimeve të thelluara gjatë verifikimit të gjenealiteteve të një shtetasi, kanë ndaluar shtetasin:

– Henri Gjapi, 26 vjeç, banues në Tiranë.

Ky shtetas ishte shpallur në kërkim, pasi Gjykata e Shkallës së Parë e Juridiksionit të Përgjithshëm Tiranë, i ka caktuar masën e sigurisë  “Arrest në burg”, për veprën penale “Vrasja nga pakujdesia”.

Më datë 31.03.2023, në rrugën “Vaso Pasha”, shtetasi H. Gj. është konfliktuar me shtetasin G. T., 46 vjeç, i cili për shkak të dëmtimeve është dërguar në spital, për ndihmë mjekësore. Gjatë këtij konflikti, ka ndërhyrë edhe shtetasi A. Gj., i cili ka goditur shtetasin H. Gj. Si pasojë e dëmtimeve, 46-vjeçari ka ndërruar jetë në spital.