“Mos më ngri zërin”, si nisi sherri në Vlorë që përfundoi me 1 viktimë. Detajet e reja

Të tjera detaje janë zbardhur lidhur me ngjarjen e rëndë të ndodhur në Vlorë, mesditën e së hënës, ku pas një sherri humbi jetën 55-vjeçari Armando Meshau, ndërsa autor i krimit është identifikuar Rei Meta, djali i anëtares së KLP-së, Murihan Seiti.

Meta është arrestuar nga policia disa orë pas krimit, ndërsa janë sekuestruar pamjet filmike, nga ku policia ka mundur të zbardhë edhe rrjedhën e ngjarjeve, që çuan në përplasjen mes Meshaut dhe autorit të dyshuar.

33-vjeçari, sipas raportimeve ka qëlluar dy herë me grusht në fytyrë Meshaun, i cili teksa ka rënë ka goditur kokën në bordurë duke humbur jetën.

Shkak i sherrit mes 55-vjeçarit që mbeti viktimë dhe 33-vjeçarit është bërë një pronë, ose më saktë një apartament. Sipas raportimeve, viktima Armando Meshau dikur ka qenë punonjës policie, ndërsa së fundmi punonte si ndërmjetës.

Nga ajo se çfarë është raportuar duket se edhe Rei Meta ka luajtur një rol ndërmjetësi për një çështje prone, ndërsa ka pretenduar që viktima duhej ti kalonte ndoshta në pronësi, një apartament, për punën që kishte kryer.

Sipas informacioneve të siguruara, theksohet se viktima dhe autori kanë ndalë nga një qendër noterie dhe më pas janë futur në qendrën e internetit që dyshohet se do të printonin dokumentet.

Por më pas bisedimet kanë agravuar. Autori pretendon se  viktima e ka ofenduar dhe më pas Rei Meta e ka goditur me grushte.

“Edhe viktima edhe autori së bashku kanë ecur në afërsi të gjykatës dhe kanë hyrë ne qendrën e internetit.

Viktima i ka thënë se duhet të printonin një material, pasi kanë hyrë brenda kanë folur dhe debatuar për vendin dhe pjesën e printimit të dokumentit.

Duket se viktima nuk kishte dokumentin me vete dhe këtu ka nisur konflikti. Në momentin që kanë qenë duke folur, viktima ka ngritur zërin dhe autori i është kundërpërgjigjur; ‘mos më ngri zërin’ dhe më pas situata ka agravuar.

Duket se usb apo dokumenti mungonin dhe kjo ka sjellë agravimin.

Të dy kanë mbërritur nga një zyrë noteri në këtë qendër interneti dhe viktima i ka thënë autorit se nëpërmjet usb do t’i mundësonte dokumentin. Viktima një ish-polici, tashmë punonte si ndërmjetës”, raporton News24.

Ndërkohë ngjarja është regjistruar nga kamerat e sigurisë, ku është fokusuar i gjithë momenti. Sipas dëshmitarëve është dëgjuar edhe diskutimi mes tyre.