Dy shqiptarë u arrestuan në Bastia Umbra për trafik kokaine. Shqiptarët të moshës 35 dhe 21 vjeç u arrestuan nga Karabinierët e Komandës së Kompanisë Asizit, pas një denoncimi nga banorët të zonës, të cilët kishin vënë re një lëvizje të dyshimtë të makinave dhe njerëzve në dy shtëpi të ndryshme në Bastia Umbra.
Karabinierët vendosën të monitoronin shtëpitë pas këtij denoncimi.
Pas një aktiviteti të kujdesshëm vëzhgimi, karabinierët kryen kontroll në njërën nga dy shtëpitë.
Gjatë kontrollit, një nga shtetasit shqiptarë ka tentuar të heqë qafe një mbështjellës celofani duke e hedhur nga dritarja. Mirëpo, ky mbështjellës u gjet më vonë dhe u zbulua se në të kishte rreth pesëdhjetë gramë kokainë.
Kërkimi ka vazhduar brenda shtëpisë, ku u gjetën rreth dy mijë euro, një peshore elektronike precize dhe material për prerjen dhe përgatitjen e dozave të kokainës.
Në oborr, i fshehur në një vrimë, u gjet një kavanoz qelqi me një kilogram kokainë dhe një tjetër peshore elektronike precize që përdoret për paketimin e drogës.
Karabinierët zgjeruan operacionet e kërkimit edhe në një shtëpi tjetër të frekuentuar nga dy burrat. Gjatë këtij kontrolli u gjetën edhe pesëdhjetë gramë kokainë të ndarë tashmë në 56 doza gati për shitje.
Në përfundim të procedurave, dy shtetasit shqiptarë u arrestuan dhe u akuzuan për trafik droge. Ata janë dërguar në burgun e Perugias në dispozicion të Autoritetit Gjyqësor për marrjen në pyetje dhe vlefshmërinë e masës së sigurisë.
Discussion about this post