Ish-agjenti i kundërzbulimit të FBI-së, Charles McGonigal, u deklarua fajtor për një akuzë konspirative në Manhattan të martën, duke pranuar se ka punuar për oligarkun rus të sanksionuar Oleg Deripaska.
McGonigal pranoi se ra dakord pasi u largua nga byroja për të punuar për një oligark që e kishte hetuar dikur si pjesë e hetimit për Rusinë dhe për të kërkuar fëlliqësi ndaj rivalit të pasur të oligarkut në shkelje të sanksioneve ndaj Rusisë.
McGonigal, 55 vjeç, pranoi fajësinë në gjykatën federale në Manhattan për një akuzë të vetme, shkeljen e Aktit Ndërkombëtar të Fuqive Ekonomike Emergjente dhe për të kryer pastrim parash, duke thënë se ai ishte ‘thellësisht i penduar për këtë’.
McGonigal i tha gjykatëses Jennifer H. Rearden se ai kreu krimin e tij në pranverën dhe vjeshtën e vitit 2021, duke pranuar mbi 17,000 dollarë për të ndihmuar manjatin rus të energjisë Oleg Deripaska duke mbledhur informacione poshtëruese për një oligark tjetër rus, i cili ishte një konkurrent biznesi i Deripaska.
“Ky, siç mund ta imagjinoni, ka qenë një proces i dhimbshëm jo vetëm për mua, por për miqtë, familjen dhe të dashurit e mi”, tha McGonigal. “Unë marr përgjegjësinë e plotë pasi veprimet e mia nuk kishin për qëllim kurrë të lëndonin Shtetet e Bashkuara, FBI-në dhe familjen dhe miqtë e mi”, tha ai në gjykatë të martën.
Në 14 dhjetor pritet të jetë seanca kur McGonigal mund të përballet me një dënim deri në pesë vjet burg.
Ndihmësprokurorja amerikane Rebeça Dell i tha gjykatësit se prokurorët kishin prova që McGonigal po bënte përpjekje për të hequr Deripaskën nga një listë e sanksioneve të SHBA. Ajo tha gjithashtu se McGonigal në 2021 ishte në negociata së bashku me bashkëpunëtorët për të marrë një tarifë prej 650,000 deri në 3 milionë dollarë për të zbuluar nga dosjet elektronike pasuri të fshehura prej 500 milionë dollarësh që i përkasin rivalit të Deripaska.
McGonigal, një banor i Manhattan-it, akuzohet gjithashtu në gjykatën federale në Uashington DC për fshehjen e të paktën 225,000 dollarëve që dyshohet se ka marrë nga një ish-zyrtar i inteligjencës shqiptare ndërsa punonte për FBI-në.
Ky rast përfshin disa momente që mund të kenë lidhje me Hunter Biden, djalin e presidentit, i cili tani është subjekt i një hetimi të posaçëm.
Ish-zyrtari i inteligjencës është identifikuar në raportet e shtypit si Agron Neza, i cili e prezantoi McGonigal me shqiptarin Dorian Ducka, i cili punonte për konglomeratin kinez të energjisë CEFC të zhdukur.
Një email nga laptopi i Hunter-it i referohet dikujt me të njëjtin emër.
“Dorian ishte një ndihmë e vërtetë që herët, kështu që ne duhet të shqyrtojmë se si ta përfshijmë atë,” shkroi bashkëpunëtori i Hunter, James Gilliar në një email të vitit 2017 për një marrëveshje.
“Nuk ka si të mos e bëjmë,” u përgjigj Hunter, duke shtuar: “dhe nëse shumica thotë jo, unë do ta heq atë nga paga ime”.
McGonigal ishte agjent special i ngarkuar me divizionin e kundërzbulimit të FBI-së në Nju Jork nga viti 2016 deri në vitin 2018. McGonigal mbikëqyri hetimet e oligarkëve rusë, duke përfshirë Deripaska, i cili u sanksionua në vitin 2018 nga Departamenti i Thesarit i SHBA-së për Kontrollin e Pasurive të Huaja.
Gjykata e Qarkut e SHBA për Distriktin e Kolumbias më vonë konfirmoi sanksionet kundër Deripaskës, duke pohuar se kishte prova që Deripaska kishte vepruar si agjent i presidentit rus Vladimir Putin.
Deripaska, themeluesi i kompanisë ruse të aluminit Rusal, ishte në mesin e 20 oligarkëve rusë dhe zyrtarëve qeveritarë të përfshirë në listën e zezë nga Uashingtoni në vitin 2018 si reagim ndaj ndërhyrjes së dyshuar të Rusisë në zgjedhjet e 2016-ës në SHBA. /Burimi: Daily Mail/
Discussion about this post