Sali Berisha dhe Lulzim Basha kanë marrë një tjetër goditje të fortë nga Ilir Meta. Pasi u mori shumicën e komisionerëve, kreu i PL tani do tu marrë edhe fondet.
Komisioni Qendror i Zgjedhjeve miratoi sot vlerën e një flete votimi, duke i bazuar përllogaritjet te zgjedhjet e 14 majit.
“Nga partitë politike nuk kemi pasur komente?! OK e miratojmë projekt-aktin nga e cila përcaktojnë vlerën e votës në shumën e 81 lekëve”, tha kreu i KQZ-së, Ilirjan Celibashi.
Partia Socialiste do të jetë ajo që do të marrë pjesën e luanit si fituese e zgjedhjeve vendore, pasi arriti të marrë mbi 579 mijë vota. Ndërsa Ilir Meta si drejtues i koalicionit “Bashkë Fitojmë” ka rreth 247 mijë vota, që do të thotë se fluksi i demokratëve do të përkthehet në më shumë fonde për Partinë e Lirisë.
Përkthyer në para, socialistët do të marrin 46.9 milionë lekë, ndërsa Ilir Meta 20 milionë. PD zyrtare mori 103 mijë vota, që do t’i japin Lulzim Bashës 8.4 milionë lekë. Me përfitim del edhe PSD-ja e Tom Doshit, që mbi 86 mijë votat e saj, do t’i përkthejë në rreth 6.9 milionë lekë.
Kjo do të thotë se Sali Berisha del “rrojtur qethur” nga 14 maji, ndërkohë edhe PD Lulzim Bashës ka përfunduar forcë e tretë. Pak ditë më parë KQZ ndau komisionerët e KZAZ-së së Kukësit, aty ku do të mbahen zgjedhjet e pjesshme. Duke u bazuar te rezultati i 14 majit, PL doli si forca e parë opozitare në pushtetin vendor dhe mori 2 komisionerë, ndërsa PD vetëm 1. Duket se tani Meta u ka marrë dhe paratë duke lënë thatë Berishën dhe duke i dhënë një tjetër goditje Bashës.
Discussion about this post