Udhëheqësit ushtarakë të Nigerit kanë rihapur hapësirën ajrore të vendit për të gjitha fluturimet tregtare që i mbyllën më 6 gusht pasi morën pushtetin me një grusht shteti. Lajmi u bë i ditur sot nga një zëdhënës i ministrisë së transportit.
Mbyllja e hapësirës ajrore kishte detyruar kompaninë franceze “Air France” dhe transportuesit e tjerë evropianë të pezullonin disa fluturime dhe të bënin rrugë më të gjata në kontinentin afrikan.
Nigeri pa dalje në det është dy herë më i madh se Franca dhe shumë rrugë fluturimi për në Afrikë kalojnë në mënyrë rutinore mbi këtë vend.
Junta ushtarake fillimisht mbylli hapësirën ajrore të Nigerit duke përmendur një kërcënim për ndërhyrje ushtarake nga organi rajonal i Afrikës Perëndimore, Komuniteti Ekonomik i Shteteve të Afrikës Perëndimore (ECOWAS). Udhëheqësit ushtarakë, nuk kanë dhënë një arsye për rihapjen e hapësirës ajrore.
Discussion about this post