Presidenti turk, Tajip Erdogan tha se Siria nuk po jep një qasje pozitive për normalizimin e marrëdhënieve me Turqinë, dhe se presidenti Bashar al-Assad nuk po merr asnjë rol, njoftuan sot mediat turke.
Duke folur me gazetarët në avionin e tij që kthehej nga bisedimet me presidentin rus Vladimir Putin në Soçi, Erdogan tha se normalizimi ishte i mundur, nëse arrihej përparim në luftën kundër terrorizmit, si dhe në kthimin e sigurt dhe vullnetar të refugjatëve dhe në procesin politik.
“Ne kemi parë përfitimet e dialogut që kemi vendosur mbi bazën e respektit të ndërsjellë, si në marrëdhëniet tona dypalëshe, ashtu edhe në nivel rajonal dhe global. Shembulli më i mirë është nisma e Detit të Zi, e cila ka dhënë një kontribut të rëndësishëm në luftimin e krizës globale të ushqimit.
Rigjallërimi i iniciativës është një çështje prioritare për të gjithë botën. Ne jemi në kontakt të ngushtë me Kombet e Bashkuara për këtë çështje. Siç e dini tashmë, ne kemi Asamblenë e Përgjithshme të Kombeve të Bashkuara këtë muaj. Atje do të kemi përsëri takime me Guterres dhe do të diskutojmë për këto çështje”, shtoi presidenti turk, duke iu referuar marrëveshjes së grurit.
Në fakt, Erdogan iu kundërvu edhe kërkesave të Moskës për t’u kthyer në marrëveshje, duke thënë:
“Rusia ka dy kërkesa specifike. Njëra është lidhja e bankës ruse bujqësore Ziraat Bank me sistemin SWIFT. Aktualisht, bankat ruse janë jashtë sistemit SWIFT për shkak të sanksioneve. Siç e dini, ky vend eksporton 120-130 milionë tonë drithë në vit. Kështu ata duan të mbledhin paratë për grurin që shesin.
Së dyti, ata duan që anijet që përdoren për transport të jenë të siguruara. Anijet duhet të jenë të siguruara për të transportuar mallra në portet evropiane ose të tjera. Për shkak të sanksioneve, kompania e sigurimeve me bazë në Mbretërinë e Bashkuar nuk i siguron anijet.”
Discussion about this post