Deputeti demokrat Saimir Korreshi tha mbrëmjen e sotme në emisionin “Open” se ish-Kryeministri Sali Berisha nuk mund të sjellë demokratët në pushtet.
Korreshi tha se demokratët në masën më të madhe janë me zotin Berisha dhe këtë e provoi edhe 6 marsi dhe 14 maji, por nuk mund të vijnë në pushtet.
“Unë e kam thënë, në pushtet nuk na sjell dot Sali Berisha, por kurrsesi Lulzim Basha. Ne nuk mund të qëndrojmë ende në qëndrime të ngurta, pasi jo ne si deputetë, por demokratët po marrin kosto”, tha Korreshi.
Ai tha se sot pati një tryezë të deputetëve, por kjo s’do të thotë se ne njohim Berishën për kryetar të PD-së.
“Nuk njohim as Berishën dhe as Bashën si kryetarë të PD-së. E kemi thënë na duhet një proces gjithëpërfshirës, ku të përfshihen të gjitha grupimet në PD dhe ne të hyjmë në procese riorganizimi të partisë”, tha Korreshi.
Lidhur me zhvillimet në PD, Korreshi tha se Basha ka vepruar njëlloj si Berisha, iku 18 muaj, e la partinë me qera te ai tjetri, dhe pastaj u kthye e tha kjo është partia ime.
“Si në zgjedhjet e 6 marsit ashtu edhe në 14 maj ne na braktisën votuesit “gri”. Nëse duhet një zgjidhje për të mbledhur votat e demokratëve na duhet një riorganizimin i plotë nga seksioni dhe me rradhë të gjitha hallkat”, tha Korreshi.
Discussion about this post