Lefter Koka në GJKKO, avokati: Nuk ka kryer asnjë shkelje ligjore

Ish-ministri i Mjedisit, Lefter Koka, po paraqet para gjykatës konkluzionet e mbrojtjes në çështjen e inceneratorit të Fierit.

Bëhet me dije se përmes avokatit, Koka pretendoi se nuk ka kryer asnjë shkelje ligjore. Sipas avokatit, Koka nuk ka pasur asnjë kompetencë vendimarrëse.

“Ministri ka vetëm një kompetencë, urdhrin për ngritjen e komisionit për dhënien e koncensionit. I pandehuri Koka ka nënshkruar kontratën koncensionare si titullar, jo si vendimarrës”, tha avokati Julian Mërtiri.

Sipas mbrojtësit, gjithë procedura është shqyrtuar nga të gjitha institucionet përkatëse.

“Ka qenë Ministria e Financave që ka vlerësuar ligjshmërinë e procedurës dhe që ka lëvruar fondet publike. Nëse do të kishte konstatuar probleme, le ta kthente”, shtoi ai.

Qëndrim mohues, Koka mbajti përmes avokatit mbrojtës edhe për akuzën e “korrupsionit”.

“Koka nuk ka asnjë kontakt me koncensionarët. Akuza nuk ka provuar as marrëveshje, as marrie-dhënie parash”, tha mbrojtësi.

Gjithashtu, avokati ka deklaruar se nuk duhet të vihen nën sekuestro pasuritë e ish-ministrit Lefter Koka. Ai thotë se pasuritë e Kokës, referuar dhe deklarimeve në ILDKPKI, janë krijuar para 2013 dhe nuk përkojnë  me përfshirjen e tij në politikë.

Më herët Prokuroria e Posaçme i ka kërkuar gjykatës dënimin e të paktën 15 personave të marrë të pandehur, kur për ish-ministrin Koka ka kërkuar dënimin me 10 vjet heqje lirie për akuzën e korrupsioni, shpërdorimit të detyrës dhe pastrimit të parave. Por për shkak se  procesi ndaj tyre është bërë me gjykim të shkurtuar  në rast se Koka do të gjenden fajtor, dënimi për të do të jetë 6.8 vite heqje lirie.

Ndërsa për ish-deputetin Alqi Bllako ka kërkuar dënimin me 7 vite burg  dhe në aplikim të gjykimit të shkurtuar dënim me 4.8 vite heqje lirie.