Gazeta kroate: Çfarë simbolizon tatuazhi i Dakut që tërboi serbët

Shqipëria mposhti Poloninë me rezultat 2:0 në xhiron e gjashtë të kualifikimeve për Kampionatin Evropian 2024.

Kuqezinjtë kaluan në avantazh në minutën e 37-të me golin e Jasir Asanit dhe Mirlind Daku që konfirmoi fitoren e vendasve në minutën e 62-të ndeshjen.

Daku mori një karton të verdhë për heqjen e fanellës pas festimit të një goli dhe në shpinë i është vërejtur një tatuazh që ishte dedikim për heroin e Kosovës, Agim Ramadanin.

Gazeta e madhe kroate “Index.hr” ka shkruar në lidhje me këtë tatuazh të Dakut, i cili sipas tyre, ka ‘çmendur’ serbët.

“Daku ka një tatuazh në shpinë të heroit Agim Ramadani – Katana, komandantit shqiptar të Ushtrisë Çlirimtare të Kosovës. Pranë tatuazhit është shkruar Katana 138. Agim Ramadani ra dëshmor në Koshare në vitin 1999 dhe sot me emrin e tij mban edhe rruga kryesore në Prishtinë” – ka shkruar mediumi kroat.

Më 1 prill 1999, “Katana” ra dëshmor gjatë një luftimi ballë për ballë me forcat serbe. Ai mori pjesë në betejën e përgjakshme të Koshares.

Beteja e Koshares njihet edhe si beteja ku u thye kufiri. Në shenjë simbolike, ushtarët e UÇK-së rrëzuan gurin e kufirit që ndante Kosovën me Shqipërinë. Prandaj edhe në tatuazhin e Dakut është pikturuar edhe një këmbë me një piramidë të rrëzuar të kufirit.