Mediet greke kanë publikuar sot fotot nga kasaforta e ish-oficerit të policisë, i cili drejtonte rrjetin kriminal që falsifikonte pasaportave greke. Mediet tregojnë se, ky rrjet raportohet se kishte ngritur struktura me detyra të ndara specifike, që shumë kompani do ta kishin zili. Ky grup i mundësonte kriminelëve kryesisht shqiptarë që të “pagëzoheshin” si grekë të ish Bashkimit Sovjetik. Bëhet me dije se, tarifa ishte zakonisht 30,000 euro për një kartë ID. Por në të paktën një rast, “klienti” kishte paguar 50 mijë euro për të marrë letrat e reja dhe identitetin e tij të ri si grek.
Nga prilli i vitit 2013, kur konsiderohet se filloi funksionimi i rrjetit e deri më sot përllogaritet që fitimet të kenë qenë rreth 5 milion euro. Pamjet nga kasaforta në zyrën e komandantit të këtij grupi, tregojnë rreth 320 mijë euro cash. Gjatë bisedave të tyre anëtarët e qarkut kanë përdorur kode komunikimi me fjalë karakteristike për dokumentet që kanë lëshuar.
Ata i referoheshin kartës së identitetit “blu” dhe pasaportës si “librezë”, ndërsa siç rezultoi, shumë prej lidhjeve telefonike që përdornin për lëshimin e dokumenteve ishin lidhje telefonike të regjistruara të anëtarëve të organizatës kriminale. Gjatë funksionimit të tij 8-vjeçar rrjeti i falsifikatorëve kishte nxjerrë të paktën 200 letërnjoftime, 135 pasaporta, 42 leje drejtimi dhe kishte hapur biznese dhe kishte krijuar borxhe ndaj shtetit, në shumën e miliona eurove.
Policia greke ka publikuar sot edhe sekuestrimet, pjesë e kreut të grupit të helenizmit me dokumente të rreme, që iu kapën gjatë kontrollit, si kasaforta, shuma e eurove brenda në kasafortë, dokumente ID dhe harta e funksionimit të grupit.
Discussion about this post