Lulzim Basha, i cili prej pothuajse dy muajsh është kthyer në krye të PD-së zyrtare, pas një heshtjeje disa ditore, duket se ka gjetur rrugën e ndryshimit.
Në rrjetin social, Basha ka postuar një foto, të shoqëruar me një koment të shkurtër mbi një takim që ka zhvilluar në Durrës me një ish të përndjekur politik.
“Sot në Durrës tek familja e Agron Famës, ish-i persekutuar në Savër dhe Maliq. Folëm për problemet e tyre si shtresë e margjinalizuar dhe rrugën për të ndryshuar”, shkruan Basha.
“Në Durrës, për të dëgjuar zërin e atyre që për një kohë të gjatë janë lënë në harresë nga politika e zhurmës, që vërtitet rreth halleve për karrige, jo rreth problemeve të qytetarëve.
Ekonomia shqiptare sot vuan mungesën e garës, e cila është kushti thelbësor për zhvillimin e qëndrueshëm. Kjo vjen si pasojë direkte e mungesës së garës në sistemin politik, që ka krijuar një ekonomi në varësi të vullnetit të qeveritarëve, duke e bërë të brishtë e të pasigurt të ardhmen e familjeve shqiptare.
Rruga për të ndryshuar këtë sistem është e gjatë dhe e vështirë, ne e kemi nisur atë e do të qëndrojmë në krah të qytetarëve për ta vendosur politikën në shërbim të mirëqenies së tyre”, deklaron Basha.
Discussion about this post