Kuvendi nuk e njeh si drejtuese të Grupit të PD, ja lëvizja e Açkës

Flutura Açka ka braktisur mbledhjen e Konferencës së Kryetarëve. Sipas raportimeve, Açka është larguar nga mbledhja për shkak se ishte e ftuar jo si kryetare e Grupit Parlamentar të PD-së, por si kryetare e Komisionit Parlamentar të Mediave.

Açka, të cilës Lulzim Basha përmes një autorizimi e ka emëruar si kryetare të Grupit Parlamentar të PD-së, nuk njihet si e tillë nga Kuvendi i Shqipërisë.

Por ajo ishte e pranishme në mbledhje me cilësinë e Kryetares së Komisionit Parlamentar, pasi Konferenca e Kryetarëve përbëhet nga drejtuesit e grupeve dhe komisioneve parlamentare.

Më herët u njoftua se lidhur me konferencën e Kryetarëve ishte thirrur Gazment Bardhi, i cili mbështetet nga pjesa dërrmuese e deputetëve demokratë, dhe tashmë duket se zyrtarisht njihet nga Kuvendi edhe si kryetar i Grupit Parlamentar.