Katër persona kanë rënë në prangat e policisë së Gramshit, ndërsa katër të tjerë janë nën hetim pasi akuzohen për veprimtari kriminale në fushën e narkotikëve.
Mësohet se, bazuar në informacionet e marra në rrugë operative, se një lokal në një lagje të qytetit të Gramshit ishte përshtatur për përdorim droge, uniformat blu ushtruan kontroll në lokalin e Emanuel Hoxhës. Si rezultat u bë arrestimi i pronarit dhe dy personave të tjerë.
Gjithashtu, gjatë kontrollit fizik të ushtruar ndaj Pëllumb Ferrës në ambientet e lokalit, Policia i gjeti një sasi lënde narkotike kokainë, ndërsa nga kontrolli në banesë iu gjetën një sasi farash kanabisi dhe një sasi lënde narkotike kanabis e ndarë në doza.
Ndërsa, Xhuliano Sadikut gjatë kontrollit fizik, iu gjet një sasi e vogël lënde narkotike kanabis e ndarë në doza. Kontrolli ka vijuar edhe në një lokal tjetër, ku gjatë kontrollit fizik ndaj klientëve të lokalit, policia arrestoi në flagrancë F. Z., 19 vjeç, pasi iu gjet një sasi lënde narkotike e ndarë në doza.
Gjithashtu u proceduan penalisht në gjendje të lirë Kidi Durda për veprën penale “Prodhimi dhe shitja e narkotikëve”, pasi gjatë kontrollit i është gjetur një sasi e vogël lënde narkotike, si dhe Roland Bollobani, Desian Kurti dhe Myftar Bici për veprën penale “Moskallëzimi i krimit”.
Materialet procedurale i kaluan Prokurorisë së Shkallës së Parë të Rrethit Gjyqësor Elbasan, për veprat penale “Prodhimi dhe shitja e narkotikëve”, “Përshtatja e lokaleve për përdorim droge” dhe “Moskallëzimi i krimit”.
Discussion about this post