Policia e Elbasanit ka arrestuar 34-vjeçarin Enea Tollumi. Ky i fundit është kapur në kuadër të operacionit të koduar “Rrjeti” ku janë arrestuar mbi 50 persona që akuzohen për shpërndarje narkotikësh.
Sipas raportimeve, Tollumi dyshohet se ishte pjesë e grupit kriminal që u godit nga policia në muajt qershor e korrik.
“Operacioni policor i koduar “Rrjeti”, i finalizuar më datë 29.06.2023, u shtri në Elbasan, Cërrik, Peqin, Belsh, Librazhd, Përrenjas dhe Pogradec.
Gjatë këtij operacioni u angazhuan 490 punonjës policie dhe 5 dronë, si dhe u kontrolluan 52 banesa dhe 18 lokale”, bëri të ditur në atë kohë Policia e Elbasanit.
Gjatë kontrolleve, Policia gjeti dhe sekuestroi në cilësinë e provës materiale: 1 kilogram e 311 gramë kokainë, 860 gramë heroinë, 1 kilogram e 317 gramë kanabis, mijëra doza kokaine, heroine, kanabisi dhe metadoni, fara kanabisi, një armë zjarri model 56, sasi municoni luftarak, pjesë të armëve të zjarrit, silenciatorë, armë të ftohta, një shumë të madhe parash prej 51 milionë lekësh, 15 mijë euro, si dhe një shumë frangash zviceriane.
Discussion about this post