Menaxhmenti i Kompleksit Sportiv Olimpik të Athinës (OAKA) njoftoi se të gjitha aktivitetet në stadiumin olimpik do të pezullohen për arsye sigurie.
Kjo pasi çatia e famshme e stadiumit, me harqet e saj ikonë, e projektuar nga arkitekti spanjoll Santiago Calatrava, kanë dështuar në testet e sigurisë.
Pas një raporti mbi aspektet problematike të kompleksit, të cilat nuk përmbushin standardet e përcaktuara, përfshi edhe strukturat metalike dhe çatinë polikarbonike, drejtuesit e stadiumit vendosën mbylljen e tij.
Ata paralajmëruan se shumë shpejt do të publikohet një raport i detajuar, ku pritet të përcaktohet edhe se sa do të zgjasë pezullimi, teksa klubi i Panathinaikosit do të duhet të kthehet në stadiumin e vjetër me 16 mijë vende, për të luajtur ndeshjet në kompeticionet europiane.
Gjithashtu edhe derbi athinas mes Panathinaikosit dhe Olympiacosit, i përcaktuar të luhej më 4 tetor në këtë impiant, nuk do të zhvillohet aty, pas vendimit të drejtuesve të Kompleksit Sportiv Olimpik të Athinës.
Stadiumi Olimpik i Athinës është më i madhi në Greqi, me një kapacitet prej 69 mijë vendesh dhe për herë të fundit iu nënshtrua një rikonstruksioni për modernizim në 2004-ën, për t’u bërë epiqendra e Lojërave Olimpike të të njëjtit vit.
Discussion about this post