Dëshmia e dhënë nga Marjus Tafani, bashkëpunëtori i drejtësisë, se dy prokurore, njëra prej të cilave e SPAK, ishin në shënjestrën e grupit të Laert Haxhiajt, kanë shkaktuar një reagim zinxhir të ambasadave të akredituara në Tiranë.
Fillimisht reagoi Ambasada e SHBA dhe më pas ajo e BE-së, ndërsa së fundmi një reagim ka bërë edhe ambasada e Britanisë së Madhe.
Në thelb të tre deklaratave është mbështetja që duhet tu jepet prokurorëve dhe gjyqtarëve për të punuar larg presioneve dhe kërcënimeve.
Në deklaratën e Ambasadës së Mbretërisë së Bashkuar bëhet thirrje që të gjithë ata që punojnë në sistemin e drejtësisë të jenë të lirë për të kryer detyrat e tyre.
“Mbretëria e Bashkuar shpreh shqetësimin lidhur me kërcënimet kundër hetuesve, prokurorëve dhe gjyqëtarëve në Shqipëri.
Të gjithë ata që punojnë në Sistemin e Drejtësisë duhet të jenë të lirë të kryejnë punën e tyre, pa frikë apo favore.
Mbretëria e Bashkuar do të vazhdojë t’i mbështesë ata në misionin e tyre jetik për të garantuar sigurinë e qytetarëve shqiptarë“, thuhet në reagim.
Discussion about this post