I riu u arrestua për vrasjen e Pashko Ujkës, i ati i del në mbrojtje: Djali ishte në Kosovë

Babai i Marjan Kolës, i dyshuar si bashkëpunëtor në vrasjen e ish-deputetit Pashko Ujkës, ka deklaruar para mediave se djali i tij është i pafajshëm.

Dedë Kola, 87 vjeç shprehet se djali i tij Marjan Kola mbrëmjen e vrasjes më 29 nëntor ka qenë në Kosovë, bashkë me autorin tjetër të dyshuar Kristjan Kola, për të blerë disa rroba.

Kola shprehet se djali i tij nuk ka asnjë lidhje me vrasjen dhe madje thotë se vetëm pak minuta para vrasjes shfaqet në një poligon qitjeje në Kosovë, ndërsa shton se nuk kanë pasur kurrë probleme dhe janë një familje dëshmori.

“Sot për djalin e pafajshëm kërkoj drejtësi se është i pafajshëm. Shteti kur të jetë i sigurt atëherë të ma marrë djalin, me ma kap pa pas asnjë faj. Unë jam familje dëshmori, si ka mundësi me e arrestu djalin pa pas asnjë lloj prove. Djali ka qenë në Kosovë me 28 me 29 po ashtu, edhe kur ndodhi ngjarja këtu me 29 ai ka qenë në Kosovë. Janë shokë, nuk kanë lidhje tjetër. As se kam njohur, as nuk kemi pasur marrëdhënie. Jam shumë i dëshpëruar. Djali iku për qejf në Kosovë me ble disa rroba. Ai ka qenë në Kosovë, nuk ka asnjë lidhje me vrasjen. Dua drejtësi”, tha babai i Kolës.

Po ashtu edhe vëllai i Marjan Kolës, Petrit Kola shprehet se vëllai i tij nuk ka asnjë lidhje me vrasjen e ndodhur pasi Marjan Kola ndodhej në Kosovë më 29 nëntor.

“Poligoni është me kamera, me orare kur ka hyrë vëllai im, kamerat i ka sekuestru shteti, duam drejtësi. Dje kam qenë në Kosovë kam bërë kallëzim në polici të Kosovës. Vëllai im është arrestu me datë 30 paradite. Pamjet filmike i ka në dispozicion prokuroria dhe policia, por nuk kanë shqyrtuar çështjen. Jemi të zhgënjyer nga kjo qeveri se dua vetëm drejtësi për vëllain. Jemi familje dëshmorësh, dua drejtësi”, deklaroi i vëllai.

Ish deputeti dhe ish kryetar komune në Velipojë, Pashko Ujka u vra mbrëmjen e 29 nëntorit pranë shtëpisë së tij, në lagjen “Vasil Shanto” në Shkodër. Dy persona janë arrestuar si autorë të dyshuar të vrasjes. Një prej të ndaluarve është Kristian Kelmendi, ndërsa i dyti është Marjan Kola 53 vjeç, si person që është i përfshirë apo ka dijeni mbi vrasjen.