Ndryshime në Policinë e Shtetit. Ervin Hodaj, drejtor i Policisë në Qarkun e Shkodrës ka marrë detyrën e Drejtorit të Krimeve të Rënda në Drejtorinë e Përgjithshme të Policisë së Shtetit, ndërkohë që në vend të tij në Shkodër është emëruar Edmond Sulaj. Ky i fundit ka mbajtur pozicionin ku është emëruar Hodaj, duke bërë kështu një rrokadë në rradhët e uniformave blu.
Hodaj mori drejtimin e Policisë së Shkodrës rreth 10 muaj më parë, ndërsa duke se ka përmbushur me sukses disa nga misionet kryesore në rolin drejtues të një prej qarqeve më problematike në vend.
Si drejtor i Policisë së Shkodrës, Hodaj mbahet mend për heqjen e kamerave të vendosura në çdo cep të qytetit nga grupet kriminale, që dukej se kontrollonin territorin në të gjithë hapësirën.
Në atë periudhë raportohej zyrtarisht për heqjen e disa qindra kamerave nga ato më të thjeshtat te më të sofistikuarat, të vendosura privatisht, por që ishin një “aset” i grupeve kriminale.
Gjithashtu Hodaj është vlerësuar për drejtimin e operacioneve anti-kanabis në një nga zonat që konsiderohej si hambari i kultivimit të bimëve narkotike.
Janë me mijëra bimë kanabisi që janë asgjësuar në territorin e Qarkut, ndërkohë që shumica e tyre kultivohej në zonat e thella, pothuajse larg syrit dhe vëmendjes të çdo strukture.
Nëse i referohemi statistikave zyrtare, në 9 muaj Shkodra ka pasur një ulje domethënëse të veprave penale kundër personit, konkretisht kanë ndodhur 5 vrasje në krahasim me 9 vrasje të ndodhura gjatë 9-mujorit të vitit 2022, si dhe 3 raste të vrasjeve të mbetura në tentativë, në krahasim me 10 vrasje të mbetura në tentativë gjatë 9-mujorit të vitit 2022.
Në kuadër të operacionit “Alpe të pastra” janë asgjësuar 196 742 bimë dhe fidanë kanabisi, 41 883 prej tyre fidanë në kubikë, duke i shkaktuar ekonomisë kriminale, një dëm prej miliona eurosh. Janë referuar 132 raste kultivimi, me 71 autorë të proceduar penalisht.
Gjithashtu nga momenti kur nisi lançimi i paketës së sigurisë në shkolla janë goditur 16 raste të shitjes së narkotikëve, duke çuar kështu në pranga shpërndarësit që vepronin ose në afërsi të shkollave ose në brendësi të lagjeve, pranë objekteve arsimore.
Discussion about this post