Ministri i Brendshëm Taulant Balla, nxiton ta cilësojë një arritje të madhe luftën e paepur të policisë për të kapur po kolegët e tyre policë.
Edhe sot ai e ka cilësuar si një meritë dhe sukses, arrestimin e 8 policëve të tjerë, ndërkohë që numri i efektivëve të arrestuar po kalon edhe atë të personave të perfshirë në krime të ndryshme.
Nuk dihet sa do të vazhdojë ky vetëpastrim, por urojmë që deri në fund ministrit Balla t’i mbetet ndonjë ‘ushtar’ nga kjo betejë.
Tetë punonjës policie janë proceduar penalisht në 48 orët e fundit. Përmes një postimi në rrjetet sociale, ministri i Brendshëm, Taulant Balla deklaroi se policët e proceduar, kanë “mbyllur sytë’ ndaj kriminelëve, apo edhe kanë bashkëpunuar me ta.
Balla u shpreh se vijon intensivisht goditja e grupeve kriminale, por edhe procesi i vetë-pastrimit të Policisë së Shtetit.
“Vijon intensivisht goditja e grupeve kriminale, por edhe procesi i vetë-pastrimit të Policisë së Shtetit. Vetëm në 48 orët e fundit janë 8 punonjës policie të proceduar penalisht, për ‘mbyllje sysh apo më keq akoma bashkëpunim me keqbërësit. Forcimi i bashkëpunimit mes Policisë së Shtetit, Prokurorisë, SPAK, Shërbimit Informativ dhe lufta e përbashkët për spastrimin e vatrave të krimit përballë dhe brenda vetë organizatës së Policisë së Shtetit, do ta çojë Shqipërinë në një tjetër nivel të sundimit të ligjit”, shkruan Balla në Facebook.
Discussion about this post