Albin Kurti ka treguar se mund të zhvillojë një takim me presidentin e Serbisë, Aleksandër Vuçiç në javën e dytë të dhjetorit në Bruksel. Duke folur për këtë çështje, kryeministri Kurti tha sot në një konferencë për media se po diskutohet mundësia e një takimi para fundit të këtij viti. “Është diskutuar mundësia e një takimi të mundshëm në javën e dytë të dhjetorit në Bruksel, me presidentin e Serbisë”, tha Kurti.
Ai tha se nuk ka informacione nëse Serbia po kushtëzon vazhdimin e dialogut dhe këtu do të jetë fokusi i diskutimeve. Sipas tij, mbajtja e takimit varet nga ndërmjetësit e Bashkimit Evropian, shefi i diplomacisë së BE-së, Josep Borrell dhe emisari i tij, Miroslav Lajçak. “Nuk kam kurrfarë informacione që ka kushtëzime nga ndokush, veçse vlerësimi se a duhet të mbahet një takim i tillë ose jo, i përket ndërmjetësuesit apo lehtësuesit – siç e quajnë ata veten – përkatësisht Z. Joseph Borrell dhe emisarit të tij, Miroslav Lajçak. Janë ata të cilët e vlerësojnë nëse do të na i dërgojnë ftesat ose jo, e jo çfarëdo kushtëzimi i palës tjetër”, u shpreh Kurti. Gjithsesi për të parë më shumë na duhet të presin ditën që do të zhvillohet takimi.
Discussion about this post