Oficerë të Policisë Gjyqësore dhe shefi i departamentit për hetimin dhe Korrupsionin në Policinë e Shtetit, raportohet se pasditen e së hënës, kanë shkuar në banesën e ish-Kryeministrit Sali Berisha.
Nga raportimet, ekipi prej 3 zyrtarësh të OPGJ dhe Policisë kanë dashur të njoftojnë ish-Kryeministrin për masën e sigurisë “detyrim paraqitje”. Kjo është tentativa e dytë që zyrtarët e Policisë duan ti dorëzojnë personalisht ish-Kryeministrit masat e caktuara nga GJKKO (detyrim paraqitje dhe ndalim të lëvizjes jashtë vendit), por në të dy rastet nuk kanë mundur të kontaktojnë me Berishën. Ky i fundit i konsideroi masat e vendosura si në kundërshtim flagrant me Kushtetutën e vendit.
Berisha, por edhe juristë të njohur, e kanë cilësuar caktimin e masës së sigurisë ndaj ish-Kryeministrit, i cili ka mandatin e deputetit, si një shkelje flagrante të Kushtetutës, përsa kohë nuk është marrë një leje nga Kuvendi i Shqipërisë.
Pas tentativës së të shtunës në mbrëmje, ku dy oficerë tentuan të kontaktojnë me Berishën në selinë e PD-së, sot 3 oficerë policie, kanë shkuar në banesën e tij në rrugën “Mustafa Matohiti”.
Ky zhvillim vjen në një kohë kur seanca për caktimin e masës së sigurisë ndaj Jamarbër Malltezit, dhëndrit të ish-Kryeministrit është shtyrë për tu zhvilluar në orën 18:00, pasi avokatët e tij kërkuan më shumë kohë për tu njohur me dosjen.
Malltezit, sipas një vendimi të GJKKO, i janë sekuestruar 6 llogari bankare dhe disa prona e apartamente, si dhe vila në Gjirin e Lalzit.
Discussion about this post