Kapen 182 kg marihuanë, dyshohet se ishte transportuar nga Serbia

Policia e Kosovës ka njoftuar se ka arrestuar dy persona dhe ka sekuestruar 182 kilogramë marihuanë.

Policia thotë se Njësia e Task Forcës e Policisë Kufitare – Lindje me Drejtorinë për hetimin e trafikimit me narkotikë në zonën kufitare Kosovë- Serbi është ndaluar vetura e dyshuar me targa vendore, ku pas kontrollimit nga njësitë policore tek e është gjetur sasi e dyshuar e narkotikëve të llojit marihuanë e cila dyshohet se ishte duke u transportuar nga Serbia për në Republikën e Kosovës.

Lidhur me rastin janë arrestuar dy të dyshuar shtetas kosovarë, Y.H. (1998) dhe D.H. (1990), si dhe janë sekuestruar lëndë narkotike 182 kg të llojit marihuanë, ku vlera e kësaj substance narkotike në treg dyshohet të jetë rreth 400.000 euro.

Si prova materiale relevante për rastin janë sekuestruar një veturë dhe një kombi me targa vendore të cilat janë përdorur në rast si dhe dy telefona celularë.

Të dyshuarit pas intervistimit me vendim të prokurorit dërgohen në ndalim policor prej 48 orësh.