I vetmi problem i Partizanit aktual janë dëmtimet. Në këtë start të sezonit kampionët kanë hasur shumë vështirësi sa u përket problemeve fizike dhe thuajse në asnjë moment stafi teknik nuk ka arritur t’i ketë të gjithë lojtarët në dispozicion.
Kjo situatë vazhdoi edhe në tri ndeshjet e fundit, teksa edhe ndaj Teutës, Abilaliaj dhe stafi nuk do të kenë të disponueshëm plot pesë lojtarë, mjaft të rëndësishëm.
Siç edhe vetë trajneri e pohoi para sfidës me Erzenin, asnjë prej të dëmtuarve nuk pritet të luajë ndaj Teutës, teksa shpresat janë që të rikuperohen për sfidën e radhës me Laçin.
Andi Hadroj vijon të jetë jashtë fushave të blerta, me muskujt e barkut, që janë kthyer në shqetësim shumë serioz dhe e kanë detyruar të jetë jashtë në shtatë, nga tetë sfidat e kampionatit.
Ndërkohë, Saliu Sembene ka hyrë në fazën e fundit të rikuperimit të frakturës në krah dhe shpresohet që ndaj Laçit të jetë të paktën në stol. Në kushtet kur edhe Sota është dëmtuar, senegalezi është mjaft i nevojshëm.
Sa i përket fierakut, ai pësoi një tërheqje muskulore në derbi dhe pritet të mungojë 3-4 javë. Ndërkohë, shpresohet që Da Silva dhe Mba të kthehen për Laçin në dispozicion. Braziliani po kuron një goditje në kavilje, ndërsa nigerianit i janë kthyer problemet me muskujt e barkut.
Discussion about this post