Belind Këlliçi, ish-deputet i PD-së dhe një nga anëtarët e PD-së së drejtuar nga Sali Berisha, shprehet se SPAK e GJKKO, kanë shkelur Kushtetutën dhe ligjin në rastin e caktimit të masave të sigurisë ndaj ish-Kryeministrit, duke anashkaluar Kuvendin.
Për Euronews Albania, Këlliçi shprehet se organet e drejtësisë duhet të zbatojnë ligjin, pasi në rastin e ish-Kryeministrit e kanë shkelur me të dy këmbët.
Në reagimin e tij, ish-deputeti shkon edhe më tej, kur thotë se SPAK ka përdorur dëshmitarë që dikur mbanin arkivolin e diktatorit Enver Hoxha, apo edhe të tjerë që nuk mbajnë mend se kush i ka korruptuar.
“Janë dëshmitarë që kanë mbajtur dikur arkmortin e Enver Hoxhës. Isa Tare, që del e thotë, mua më ka sjellë njerëz Berisha për të më korruptuar për të më dhënë një apartament në këmbim të firmës sime për privatizim, por nuk e mbaj mend se kush ka ardhur dhe me personazhe qesharakë të dënuar për trafik droge, këto janë dëshmi qesharake, të pabazuara në fakte”, thotë Këlliçi.
Discussion about this post