Mark Marku: Berisha ka mbështetës, por sa mund të rrezikojnë ata…

Mark Marku, ish-deputet i PD-së, tha se koston, qoftë edhe të një lideri politik, nuk mund ta marrë i gjithë formacioni politik që ai drejton.

Në këtë kuadër, Marku tha në Klan News se nisja e një hetimi ndaj ish-Kryeministrit Sali Berisha, mund të ketë lidhje edhe me një goditje të opozitës, por në anën tjetër, nuk ka pse opozitës ti ngarkohet kostoja, qoftë edhe e liderit.

“Ekzistojnë dyshime të arsyeshme që përmes Berishës të goditet opozita. Por nëse Berisha del i pafajshëm, atëherë kjo natyrisht që do të sjellë një fuqizim të opozitës”, tha Marku.

Sipas tij, në Shqipëri duhet ti jepet fund idesë që politikanët mund të sfidojnë gjykatat.

Ish-deputeti bëri një paralelizëm mes asaj që po ndodh në SHBA me ish-Presidentin Trump dhe situatës në Shqipëri me Berishën, ndërsa shtoi se këtu prej vitesh opozitën e kanë futur në një “kurth”.

“Berisha ka mbështetës personal, problem është sa janë të gatshëm të rrezikojnë këta mbështetës të tij?

Së dyti deri ku mund të shtrihet aksioni opozitar, dhe mbi çfarë kauze?”, tha Marku. Por sipas tij, kjo ka anën tjetër, që një betejë e humbur, do të jetë shumë dëshpëruese për popullin opozitar.