GJKKO ka konfirmuar masën detyrim paraqitje ndaj ish-Kryeministrit Sali Berisha, i cili është person nën hetim nga SPAK lidhur me privatizimin e kompleksit Partizani.
Gjithashtu ish-Kryeministrit i ndalohet të dalë nga territori shqiptar, pa një vendim. Në vendim thuhet se Berisha duhet të paraqitet të hënën e parë dhe të tretë të çdo muaji, në orën 10:00.
Vendimi është marrë në seancën e pasdites të drejtuar nga gjykatësja Irena Gjoka, ndërsa ish-Kryeministri mbrohej nga avokatja Valentina Todoresku, pasi dy avokate të caktuara kryesisht nga GJKKO, u tërhoqën.
“Në datën 26.10.2023, ora 15.00, në Gjykatën e Posaçme të Shkallës së Parë për Korrupsionin dhe Krimin e Organizuar, u riçel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt “Marrjen në pyetje të shtetasit nën hetim Sali Berisha”.
Të pranishëm në sallën e gjykimit ishin prokurorët Arben Kraja dhe Enkeleda Millona, ndërsa i hetuari Sali Berisha u përfaqësua nga mbrojtësit e caktuar kryesisht nga gjykata, av.Rabije Cenalia dhe av.Jalldiz Kastrati.
Gjykata bëri me dije se pranë kryesekretarisë së kësaj gjykate, ditën e sotme, datë 26.10.2023, ora 09.45, është depozituar një kërkesë nga shtetasi Sali Berisha, me objekt përjashtimin e gjyqtares nga gjykimi i kësaj çështje. Mbi këtë kërkesë, me vendimin nr.430 Akti, datë 26.10.2023 të GJKKO është vendosur mospranimi i kërkesës së kërkuesit Sali Berisha, me objekt përjashtimin e gjyqtares Irena Gjoka, si të pabazuar në prova dhe në ligj.
Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha”, thuhet në njoftimin e GJKKO.
Discussion about this post