Kryeministri Edi Rama ka reaguar sërisht përm,es postimeve në rrjetet sociale përsa i takon normalizimit të marrëdhënieve mes Kosovës dhe Serbisë, madje në mesazhin e tij shkruan “bëni paqe paj zotin e shikoni përpara”.
E ndërsa përshëndet vendimin e Qeverisë së Kosovës për të pranuar propozimin e BE-së për normalizimin e marrëdhënieve me Serbinë, Rama shkruan se nuk mund ta fsheh kënaqësinë sepse sot Kosova është në një pozicion më të mirë në arenën ndërkombëtare.
Duke mbajtur rolin e një “këshilluesi ndërkombëtar”, Rama shprehet se është koha kritike që Serbia të bëjë të njëjtën gjë.
“Çdo gjë e pranuar dhe dakordësuar deri tani duhet të zbatohet pa vonese”, shprehet Rama duke i bërë thirrje partnerëve perëndimorë që të mbajnë këtë momentum dhe të shtyjnë palët drejt zgjidhjes përfundimtare.
Postimi nga Edi Rama
“Urtësia e popullit shqiptar dhe jo vetëm e tij në fakt, mëson se “më mirë vonë se sa kurrë”. Nuk mund ta fsheh kënaqësinë time që udhëheqja e Kosovës më në fund bëri gjënë e duhur në takimin e djeshëm të Brukselit! Duke pranuar me mençuri propozimin e BE-së më 21 tetor Kosova sot ndodhet në një pozitë shumë më të mirë. Ky është një hap shumë i rëndësishëm përpara.
Është koha kritike që Serbia të bëjë të njëjtën gjë. Çdo gjë e pranuar dhe dakordësuar deri tani duhet të zbatohet pa vonese.
U bëj thirrje partnerëve tanë perëndimorë që të mbajnë këtë momentum dhe të shtyjnë palët drejt zgjidhjes përfundimtare.
Mjaft më duke parë gishtin teksa gishti tregon hënën. Mjaft më me të njëjtat muhabete të vjetra dhe të rrezikshme. Mjaft më me shmangien e paqes dhe ushqimin e fantazma të së kaluarës për hir të vogëlsisë së politikës së brendshme.
Shikoni jo shumë larg nga këtu se çfarë u ndodh atyre që i shmangen paqes dhe angazhohen në lojëra “o të gjitha o asgjë”. Ne kemi nevojë për paqe, stabilitet dhe bashkëpunim në këtë lagje të Europës.
Bëni paqe paj Zotin dhe shikoni përpara!”
Discussion about this post