“Ciaran” stuhia që ka goditur disa shtete në Europën Perëndimore dhe Britaninë e Madhe po shkakton kaos.
Në Francë raportohet për të paktën 5 viktima dhe plagosjen e shumë të tjerëve, ndërsa shpejtësia e erës e regjistruar arrin në mbi 190 km/h. Si pasojë janë shkulur pemët duke e bërë të pamundur lëvizjen e qytetarëve.
Sipas autoriteteve franceze rreth 15 persona janë lënduar në pjesën perëndimore dhe veriore të vendit. Shtatë nga të lënduarit janë punonjës të ekipeve të emergjencës.
Rreth 1.2 milionë familje franceze kanë mbetur pa energji elektrike ndërsa linjat hekurudhore në një zonë të Francës Perëndimore janë pezulluar.
Një situatë e rënduar paraqitet edhe në Mbretërinë e Bashkuar, ku mijëra familje kanë mbetur pa energji elektrike.
Dhjetra familje janë detyruar të evakuohen nga shtëpitë e tyre dhe të kërkojnë strehim në hotele. Qindra shkolla në jugperëndim të Anglisë janë të mbyllura ndërsa aeroportet dhe linjat hekurudhore kanë ndalur punën.
Autoritetet britanike u kanë bërë thirrje banorëve që të përgatiten për përmbytje, pasi nivelet e disa lumenjve mbeten të larta.
Në Spanjë, ku stuhia goditi pjesën më të madhe të vendit me shira të dendur dhe erëra të forta është shënuar edhe një viktimë.
Një grua humbi jetën pasi një pemë ra mbi të. Tre persona të tjerë po në kryeqytetin spanjoll kanë mbetur të lënduar. Parqet në kryeqytet dhe qytete të tjera në Spanjë u mbyllën dhe disa fluturime u anuluan.
Një situatë e ngjashme paraqitet edhe në Belgjikë aty ku ka edhe një viktimë dhe raportohet për disa të lënduar.
Discussion about this post