Reshjet e shiut duket se kanë hapur “maratonën” e tenderave për mirëmbajtjen e shtretërve të lumenjve dhe pyjeve përreth, ndonëse këto masa parashikohen të merren që në stinën e verës, për të parandaluar dëmtimet nga fatkeqësitë natyrore. Bashkia e Himarës me drejtues Jorgo Goron, ka dhënë një tender me objekt “Mbrojtje lumore dhe pyllëzim të anës së lumit Borsh”. Kontrata që do të zgjas vetëm 60 ditë, i është akorduar një fond mbi 9 milionë lekë (saktësisht 9 257 221,00 lekë).
Ndërkohë tenderi është fituar pa garë nga kompania ” KOLA INVEST ” shpk & “IMPLEX” shpk”. Për të kryer procedurën garuese në garë për këtë tender është dhe kompania “COLOMBO” shpk & “NDERTIMI” shpk, e cila është skualifikuar automatikisht pasi ka humbur të drejtën për të marrë pjesë në tendera. Për këtë arsye, kompania në fjalë nuk duhet të regjistrohej në garë. Në këto kushte tenderi është zhvilluar me vetëm një konkurrent, duke u klasifikuar me “flamur të kuq”, me rrezik të të lartë abuzimi nga autoritetet.
Në korrik të këtij viti kryeministri Edi Rama mblodhi krerët e pushtetit vendor të të gjithë Shqipërisë, ku iu kërkoi të ndalonin abuzimet me tendera apo ato që ai vet i cilësoi si ‘kostume të qepura me porosi”, pasi në të kundërt nuk do të kishte tolerime dhe të tilla shkelje do të konstatoheshin, duke vënë para përgjegjësisë abuzuesit. Disa muaj më pas këto deklarata të kryeministrit dukshëm janë harruar nga ai vet dhe patronazhistët e tij, të cilët nuk kanë survejuar asnjë rast të shpërdorimit të parave të taksapaguesve.
Discussion about this post