Në zonën e NënShkodrës kanë nisur përmbytjet e para. Ne fushën e Goricës janë rreth 200 ha toke nën ujë si shkak i përroit kufitar me Malin e Zi, në të cilin nuk është ndërhyrë. Për këtë është prononcuar për Gijotina.com administratori i njësisë Ana e Malit në Bashinë Shkodër, Arben Ceni.
Ceni, është shprehur se ka edhe një përgjigje për ministrin Peleshi. “Situatën e dimë me mirë se Peleshi. Zona e Obotit ka problem vetëm më mirë-menaxhimin e kaskadës së Drinit.” Ndërkohë, niveli i Bunës është rritur, ç’ ka shton rrezikun e përmbytjeve.
Administratori Ceni tha se një problematikë tjetër është ajo që banorët ende nuk kanë marrë dëmshpërblimet e dy përmbytjeve të fundit. Gjithashtu, banorët e zonës së Obotit kanë nxjerr varkat dhe janë mobiluar, ndërsa e vetmja shpresë janë që reshjet e shiut të pushojnë dhe digat mos të hapen nga ana e shtetit, siç ka ndodhur gjithmonë.
Banorët e Njësisë Administrative Ana e Malit janë më të prekurit sa i takon përmbytjeve , ndërsa premtimet nga ana e dy fronteve politike kanë qenë të shumta gjithmonë kanë ngelur pa u plotësuar, duke bërë që këta banorë të ndihen të harruar si nga pushteti vendor dhe ai qendror.
Discussion about this post