Ish-presidenti republikan Donald Trump ndodhet përpara presidentit demokrat në detyrë Joe Biden në sondazhet e kryera në disa shtete, një vit përpara zgjedhjeve presidenciale.
Kështu tregojnë anketat e realizuara nga “New York Times” dhe kompania “Siena Poll”, sipas të cilave Trump, aktualisht i pari në nominimet republikane, ndodhet përpara Biden në Nevada, Xhorxhia, Arizona, Miçigan dhe Pensilvani; ndërsa Biden kryeson ngushtë në Uiskonsin. Bëhet fjalë për shtete të lëkundura, ku demokratët fituan në zgjedhjet e kaluara.
Konkretisht, Trump udhëheq ndaj Biden me nga 3 deri në 10 pikë në 5 shtetet e para, ndërsa presidenti aktual me 2 pikë në shtetin e fundit.
Edhe pse zgjedhjet janë ende një vit larg dhe shifrat mund të ndryshojnë, këto sondazhe reflektojnë dyshimet e votuesve për Biden, kryesisht për shkak të moshës së tij dhe pakënaqësinë ndaj mënyrës së menaxhimit të ekonomisë.
Nga ana tjetër, ajo që bie në sy është se si problemet gjyqësore për Trump, i përfshirë në një proces civil dhe në 4 procese penale, nuk po ndikojnë në rënien e popullisisë së tij. Për më tepër, nuk ka ligj në Shtetet e Bashkuara që e ndalon atë të kandidojë për t’u rizgjedhur, edhe nëse dënohet dhe dërgohet në burg.
Sondazhet u kryen me telefon ndaj 3.662 votuesve të regjistruar mes datave 22 tetor dhe 3 nëntor.
Por, ndërsa Biden është i lirë të vendosë për rikandidimin, Trump i duhet ende të mundë figura si Ron de Santis, Nikki Haley, Chris Christie dhe pretendentë të tjerë, që megjithatë nuk kanë arritur ta tejkalojnë atë në renditje.
Discussion about this post