Partizani i këtij sezoni duket si një skuadër me shumë eksperiencë për mënyrën se si luan dhe maturinë që ka gjatë ndeshjeve, një pjesë të madhe të të cilave i ka fituar edhe në minutat e fundit, por “heronjtë” janë shumë të rinj.
Të kuqtë kanë shënuar 19 gola në 11 ndeshje të luajtura, të shpërndara në 10 shënues, çka tregon edhe se të gjithë dinë të shënojnë, nga mbrojtja në sulm. Shënuesi më i vjetër i të kuqve në këtë fillimsezoni është Gjelbrim Taipi, teksa më pas e ndjekin Viktor da Silva, 28 vjeç dhe Alfred Mensah, 24 vjeç.
Të gjithë të tjerët janë nën 23 vjeç, çka tregon qartë për një skuadër të re, që e njeh shumë mirë golin dhe që mund të të ndëshkojë në çdo moment.
Zbulimi i madh quhet Bintsuka, me 21-vjeçarin, që ka arritur të shënojë plot 5 gola dhe është shënuesi më i mirë i ekipit. Maget Gueje është gjithashtu një emër i spikatur në këtë fillimsezoni, me senegalezin, që ka tundur dy herë rrjetën, përveçse është një “luftëtar” në mesfushë.
Discussion about this post