Zëvendëstrajneri i Kombëtares shqiptare, Pablo Zabaleta, ka shpjeguar sot zgjedhjet që ka bërë trajneri Silvinjo për sfidën e fundit në grup ndaj Ishujve Faroe. Edhe pse tekniku ka ndryshuar shumë lojtarë, Zabaleta ka vendosur theksin te qëndrueshmëria në këtë duel, teksa në pjesën e dytë ka lënë të kuptohet se mund të ketë në fushë edhe të tjerë lojtarë që kanë luajtur më pak minuta.
“Ne deshëm të futnim lojtarë që ishin më të freskët fizikisht e mendërisht. Në Moldavi ishte një ndeshje e vështirë, jo vetëm fizikisht, por edhe në aspektin mendor se kishte trysni, ankth e të gjitha. Menduam se duhet të bënim disa ndryshime sot.
Bajrami është një numër 10 dhe në klubin e tij luan normalisht në atë pozicion dhe ne mendojmë se është futbollisti që mund të na japë një futboll të mirë mes linjave. Muçi është më shumë një sulmues se një 10. Por po punojmë me të që të luajë në atë pozicion dhe ndoshta në pjesën e dytë mund të luajë disa minuta.
Është ndeshje që duam ta fitojmë, duam ta mbyllim me stil, në krye të grupit. E kemi përgatitur me seriozitet, do të shohim në pjesën e dytë, mund të bëjmë ndryshime e t’i japim hapësirë lojtarëve që nuk kanë luajtur shumë. Edhe Muçolli është një lojtar që e kemi afruar për herë të parë, mund ta shohim. Kushdo të luajë, e dimë që duhet të bëjmë punën dhe të fitojmë”, tha Zabaleta para ndeshjes.
Discussion about this post