Mjeku i Donald Trump në raportin mjekësor të publikuar dje, tha se ish-presidenti amerikan është në “shëndet të shkëlqyer” dhe shtoi se ai “do të vazhdojë të jetojë një mënyrë jetese të shëndetshme dhe aktive për shumë vite”.
Raporti mjekësor, të cilin Trump 77 vjeç, e postoi në Truth Social, u publikua në ditën kur presidenti demokrat Joe Biden festoi ditëlindjen e tij të 81-të. Shëndeti fizik dhe mendor i të dy burrave është bërë një çështje kryesore përpara zgjedhjeve presidenciale të vitit 2024, në të cilat ata pritet të jenë sërish rivalë.
“Presidenti Trump e ka mbajtur peshën e tij poshtë përmes një diete të përmirësuar dhe aktivitetit të vazhdueshëm fizik të përditshëm duke mbajtur një orar shumë të ngjeshur ”, thuhet në njoftimin mjekësor të nënshkruar nga Bruce Aronwald, një osteopat nga Nju Xhersi.
Në raportin mjekësor nuk përmenden detaje të tjera.
Rezultatet e “testeve të tij mjekësore janë brenda kufijve normalë dhe testet e tij të shëndetit mendor janë të shkëlqyera”, shtoi Aronwald.
Trump është favorit për të fituar nominimin presidencial republikan, ndërsa Biden ka thënë se do të kandidojë për një mandat të dytë.
Në vitin 2016, Harold Bornstein, mjeku i ish-presidentit republikan, paraqiti një raport të ngjashëm shëndetësor për Trump dhe theksoi se ai nuk kishte marrë asnjë udhëzim nga ai për përmbajtjen e tij.
Trump tha se peshon 98 kilogramë dhe është 1.90 metra i gjatë në gusht kur u shfaq në një burg në Atlanta në lidhje me përpjekjen e tij për të përmbysur rezultatin e zgjedhjeve presidenciale të vitit 2020 në Gjeorgji.
Discussion about this post