Një gazetar ose punonjës i medias vritet mesatarisht çdo ditë në luftën Izrael-Hamas, pohoi kreu i i Federatës Ndërkombëtare të Gazetarëve (IFJ), çka e bën këtë një konflikt të paprecedent sa i takon pasojave tek media.
Të dhënat e këtij organizimi tregojnë se që nga fillimi i luftës në 7 tetor, janë vrarë gati 60 përfaqësues të mediave, një bilanc ky që i afrohet atij të gazetarëve të vrarë gjatë gjithë Luftës së Vietnamit, e cila nga ana tjetër zgjati për dy dekada. As luftërat e tjera brutale në Lindjen e Mesme nuk i janë afruar intensitetit të kësaj aktuale.
“Këtë lloj masakre nuk e kemi parë në një luftë tradicionale si për shembull ato në Siri, në Irak, në ish-Jugosllavi”, pohoi sekretari i përgjithshëm i Federatës Ndërkombëtare të Gazetarëve, Anthony Bellanger për Associated Press. Edhe gjatë fundjavës pas përfundimit të armëpushimit, u vranë tre ose katër (gazetarë) të tjerë, shtoi ai. Nga gazetarët e vrarë, të paktën 51 janë palestinezë, e të tjerët izraelitë e libanezë.
Shumica e kanë humbur jetën gjatë bombardimeve izraelite në Rripin e Gazës. Shifrat bazohen në të gjitha burimet që federata përdor për raportin e saj vjetor. Përveç viktimave në njerëz, në Gazë janë shkatërruar edhe objektet e shumë organizatave mediatike. Përpara konfliktit në këtë territor kishte rreth 1,000 gazetarë dhe punonjës të medias, por tani sipas Bellanger askush nuk mund të dalë prej andej. IFJ dhe “Gazetarët pa Kufij” u kanë bërë thirrje prokurorëve të Gjykatës Penale Ndërkombëtare (ICC) të hetojnë vdekjen e gazetarëve dhe punonjësve të medias.
Discussion about this post