Kryedemokrati Sali Berisha është shprehur në një deklaratë për mediat sot pas mbledhjes së Grupit parlamentar se aksioni i opozitës do të vijojë dhe se në mënyrë të pashmangshme do të shkohet drejt një proteste popullore masive.
I pyetur se cili është skenari i opozitës për seancën e të enjtes në Parlament, Berisha u shpreh se nuk mund ta zbulojë pasi “armiku do të marrë masa”, duke iu referuar mazhorancës.
Sipas tij opozita do të dëgjohet fuqishëm nga shqiptarët dhe mbarë bota në lëvizjen e saj.
“Po shkohet drejt një situate që bëhet gjithnjë e më dramatike. Një situate në të cilën qytetarët janë të ftuar të ngrihen në gjithë guximin e tyre për të përmbysur këtë regjim që nuk njeh ligj e rregull.
U vendos, protesta vazhdon, ju e keni parë fuqinë e saj në parlament. Ju garantoj se shkohet në mënyrë të pashmangshme drejt protestës masive popullore. Nëse e themi skenarin sot për të enjten armiku do marrë masa, ata masat që do marrin, do dyfishojnë gardën, do marrin 200 në vend të 100. Ne do të dëgjohemi fuqishëm nga shqiptarët dhe mbarë bota”, u shpreh ai.
I pyetur se çfarë do të bëjë opozita më 8 dhjetor, datë kur Partia Socialiste do të mbajë Kuvendin, Berisha tha se PD do të vazhdojë traditën e saj, atë të përmbysjes së diktatorëve.
“Një maskë mafioze nga Edi Rama ajo që bën ai, ndërsa partia Demokratike do të vazhdojë traditën e saj, të përmbysë diktatorin” shtoi ish-kryeministri.
Discussion about this post