Në një kohë që mazhoranca ka futur me procedurë të përshpejtuar në Parlament miratimin e marrëveshjes me Italinë për emigrantët, kryetari i grupit parlamentar të Partisë Demokratike, Gazment Bardhi, thotë se Gjykata Kushtetuese duhet ta pezullojë. Në të kundërt do të tregojë që edhe kjo Gjykatë nuk po bën asgjë tjetër, veçse po shndërrohet në një shtojcë pa vlerë të Edi Ramës.
Bardhi thotë se i ka dërguar një kërkesë Kushtetueses për pezullimin e procedurës.
“Marrëveshjet ndërkombëtare i nënshtrohen kontrollit nga Gjykata Kushtetuese përpara ratifikimit të tyre. Mazhoranca socialiste, edhe pse ka një kërkesë për kontrollin e kushtetutshmërisë, duke shfrytëzuar heshtjen e çuditshme të Gjykatës Kushtetuese, po shqyrton me procedurë të përshpejtuar marrëveshjen me Italinë dhe në kundërshtim me kalendarin e miratuar nga Koferencën e Kryetarëve parashikon miratimin e saj në seancën e datës 14 Dhjetor 2023.
Sot kam ripërsëritur për herë të tretë kërkesën drejtuar Gjykatës Kushtetuese për pezullimin e procedurës parlamentare për ratifikimin e marrëveshjes. Gjykata Kushtetuese duhet të sillet si e tillë dhe jo i shtojcë pa vlerë e Qeverisë së Edi Ramës. Marrja në shqyrtim paraprak menjëherë e kërkesës së opozitës është detyrim që buron nga Kushtetuta dhe Ligji për Gjykatën Kushtetuese! E kundërta është atentat ndaj shtetit ligjor dhe minon përfundimisht besimit tek Gjykata Kushtetuese.”, u shpreh ai.
Discussion about this post