Opozita e drejtuar nga ish-Kryeministri Sali Berisha ka thirrur një protest kombëtare para Kuvendit të Shqipërisë ditën e enjte.
“So sot o kurrë” është slogani i protestës, e cila sipas organizatorëve nis në orën 09:00, ndërkohë që seanca plenare fillon në orën 10:00.
Deputetët demokratë do të vijojnë me protestën e tyre brenda sallës së Kuvendit, ndërsa jashtë Parlamentit pritet të mblidhen mbështetës të opozitës jo vetëm nga Tirana, por edhe nga rrethet.
Në seancën e së enjtes pritet të votohet edhe raporti i Këshillit të Mandateve që i hap rrugën SPAK në vendosjen e një mase arresti për ish-Kryeministrin Sali Berisha. Pavarësisht se në deklaratat publike protesta thuhet se është thirrur për mosplotësimin nga ana e mazhorancës së drejtuar nga Edi Rama të kërkesave të opozitës që kanë të bëjnë me komisionet hetimore, por edhe me zëvendësimin e anëtarëve të saj në Komisionin e Reformës Zgjedhore, është e vështirë të bësh një ndarje që protestuesit nuk do të marrin pjesë në protestë, edhe për të mbështetur liderin historik të PD-së, ish-kryeministrin Sali Berisha, përballë kërkesës së SPAK.
Ky i fundit arriti të marrë mbështetjen e 6 anëtarëve të Këshillit të Mandateve, 5 deputetëve socialistë dhe Enkelejd Alibeajt nga grupimi i Lulzim Bashës, për miratimin e një autorizimi që me miratimin në seancë, i hap rrugën SPAK-ut që të kërkojë në GJKKO një masë arresti shtëpie ndaj Berishës.
Kreu demokrat akuzohet nga SPAK se ka favorizuar dhëndrin e tij, Jamarbër Malltezi në procedurat për privatizimin e ish-kompleksit Partizani, ndërsa Berisha e ka konsideruar dosjen e SPAK si një sulm politik që i bëhet atij dhe familjarëve të tij me urdhër të Edi Ramës. SPAK kishte vendosur dy masa ndaluese për ish-Kryeministrin “detyrim paraqitje” dhe “ndalim të daljes jashtë vendit” që u konsideruan si legjitime nga GJKKO në dy shkallët e vlerësimit të masave të sigurisë, por që nuk u njohën nga kreu demokrat me argumentin se SPAK nuk kishte marrë më parë lejen e Parlamentit.
Discussion about this post