Bulqizë, humb jetën në rrethana të paqarta punëtori në fabrikën e kromit

Një ngjarje e rëndë është regjistruar në Bulqizë, ku një punëtor në fabrikën e kromit ka humbur jetën në rrethana ende të paqarta.

Mësohet se, 65-vjeçari, i cili punonte me kohë të pjesshme tek fabrika e pasurimit të kromit të Bulqizë është gjetur pa shenja jete, ndërsa ende nuk bëhet i ditur identiteti i tij. Ngjarja e rëndë është shënuar tek dampa ku shkarkohet rëra, që del nga përpunimi i pasurimit të kromit nga fabrika.

Ndërkaq, policia ka mbërritur menjëherë në vendngjarje, ndërsa grupi hetimor ka nisur menjëherë hetimet për të bërë të mundur zbardhjen e plotë të rrethanave të ngjarjes.

Miniera e Bulqizës ka marrë shpesh jetë njerëzish për shkak të kushteve jo të sigurta të punës, ku rasti më i fundit ishte ai i Muharrem Plakut, i cili u bllokua pesë ditë brenda minierës, nga ku doli i pajetë.