Ditën e sotme, Ministrja e Infrastrukturës, Belinda Balluku, bëri me dije se qeveria ka vendosur që rritja e çmimit të energjisë të mos aplikohet te familjarët dhe bizneset e vogla pas 1 janarit, ashtu sikur ishte parashikuar në fillim. Por, kjo barrë e rëndë bie mbi 7 mijë biznese të tjera, të cilëve iu është kërkuar që ta gjejnë vetë energjinë në treg dhe jo ta marrin me çmim të rregulluar nga shteti.
Në lidhje më këtë çështje ka folur gjatë një interviste televizive Drejtori i Furnizuesit të Shërbimit Universal, Elton Sevrani, i cili tha se këtyre bizneseve iu është kërkuar të shkëpusin kontratën me OSHEE. Sipas tij, kjo bëhet për të liberalizuar tregun. Sakaq, ai tha se edhe për dy vite disa bizneseve do iu jepet mundësia të marrin energji nga FMF, që është pjesë e OSHEE po me çmime të përcaktuara sipas bursës.
“Ne po vazhdojmë me liberalizimin e tregut tashmë për abonentët e lidhur në tension e mesëm 6, 10 dhe 20 kV. Janë plotësuar edhe kushtet ligjore, por edhe teknike për këtë detyrim që ne kemi. Në këto kushte kemi njoftuar abonentët se pas 1 janarit janë të lirë të gjejnë furnizuesin e tyre dhe të shkëpusin kontratën me OSHEE. Ne, gjithsesi do t’i japim edhe një mundësi që brenda dy viteve ata të furnizohen nga Furnizuesi Mundësisë së Fundit, që është pjesë e OSHEE, por tarifa nuk do jetë e përcaktuar nga Enti Rregullator, por në bazë të çmimeve që e blejmë në bursa”, tha ai. Më tej, Servani tregoi se çmimet e reja të energjisë do variojnë në nivel të bursës, mund të shkojnë nga 8 në 11 lekë, 17 apo 33 lekë. Pra, kjo tregon se taktikat që po përdor qeveria nuk janë aspak në mbrojte të konsumatori dhe në mbështetje të biznesit, përkundrazi po i rëndon ata më shumë dhe lë hapësira për rritje marramendëse të çmimit për energjinë elektrike.
Discussion about this post