Avokatët e Sali Berishës kanë ankimuar masën e vendosur ndaj tij për “arrest në shtëpi”, e cila u ndërmor nga Gjykata kundër Korrupsionit dhe Krimit të Organizuar, me kërkesë të Prokurorisë së Posaçme SPAK.
Sipas ligjit që e kërkon ankimimin brenda afatit 5-ditor nga shpallja e vendimit, avokatët e Berishës depozituan ankimimin e tyre duke kundërshtuar këtë masë sigurie.
GJKKO ndryshoi masën e sigurisë nga ‘detyrim paraqitje’ në ‘arrest shtëpie’ për Berishën me kërkesë të SPAK. Berisha dyshohet për korrupsion në lidhje me privatizimin e ish-kompleksit Partizani.
Kujtojmë se tre ditë më parë Gjykata e Posaçme pranoi kërkesën e SPAK për shtrëngimin e masës së sigurisë për ish-kryeministrin i dyshuar për kryerjen e veprës penale “korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim në aferën e privatizimit të ish kompleksit Partizani.
Sali Berisha urdhërohet të mos largohet nga banesa ku do të jetë me mbikqyrje periodike policore dhe duhet të ketë kontakt vetëm me personat që jetojnë me të në të njëjtën banesë. Gjithashtu i ndalohet komunikimi me persona që nuk janë familjarë.
Discussion about this post